عِرق في السياسة : الطريفي ابونبأ : محاولة لتخفيف وجع المريخاب

هنالك نوع من البشر حياتهم كلها جد ومانسمية ( هظار) ساي… وساي دي مهمة رغم خروجها من الأقواس يسمونة استهزاء واستهتار ويمكن لأحدهم ان يربط ذلك با ( التنمر) او العنصرية… مع ان الاتفاقية بتقول ان مابين الهلال والمريخ روح طيبة ومناكفات لذيذة لا تفسد الود وإن كان بالاربعة…. المهم حاولت أن أكون ظريف وانا اسأل احد المشجعين المريخاب… انتو امس الحاصل شنو…؛ المريخ دا باع الكورة ولا مالو.. بكل جدية سحبني المريخابي وهو يمسك بيدي والله اقول ليك حاجة ماتستبعد ذلك انت عارف ناسنا ديل طوابير والمدرب المصري دا فرض عليهم وبدأ يشرح لي المحاولة التي يقودها ابليس للنيل من النادي الأحمر بمعاونة دويلة الإمارات والدعم الصريع… وكيف أثر قرار زيادة الدولار الجمركي على اللاعبين في الملعب ووو… وووو… حتى سألني انت رايك شنو… قلت له انا محيرني حاجة واحدة الهلال ( مفلس) والدليل وصولهم ( 15) لاعب فقط ورغم دا جماهيرة أطلقت الشماريخ دي جابوها من وين… قال لي والله انت جيتني في الوجع عارف الشماريخ دي جبناها نحن بس بعد زعلنا رميناها في الملعب ليستغل الهلالاب ذلك ويحتفلون بها في الملعب…..
امس قدم الأقمار مباراة للتاريخ ورباعية نارية احرقت شباك التونسي وقدمته قربان للشطب مع أصدقائه الأجانب…
وماحدث في الملعب جعل بعض المشجعين الحمر يرددون ابيات حميد الهلالي والحسرة تقتلهم…

حملونا احنا الغلابه كل خوازيق الخسارة آه يا بلد آه تناتف وتندلع مليون شرارة يا بلد طلقيتا ساكت خيلا
والخسارة بالاربعة حولت الجماهير الحمراء لسياسيين عظماء يحللون وينطرون وفي النهاية كتبت لهم الأربعة ولافرار منها….